ភ្នំពេញៈ ប្រធានស្តីទីរដ្ឋសភាកម្ពុជាលោក ជាម យៀប កត់សម្គាល់ពីការរីកចម្រើននៃកិច្ចសហប្រតិបត្តិការកម្ពុជា-ថៃ ក្នុងក្របខ័ណ្ឌរដ្ឋាភិបាល និងគណបក្សកាន់អំណាចនៃប្រទេសទាំង ២ ពោលគឺគណបក្សប្រជាជនកម្ពុជានិងគណបក្សភឿថៃ ដែលធ្វើឱ្យមានការបង្កើនផលប្រយោជន៍ដល់ប្រទេសនិងប្រជាជននៃប្រទេសទាំង ២។
ការកត់សម្គាល់របស់ប្រធានស្តីទីរដ្ឋសភាកម្ពុជា ធ្វើឡើងនៅក្នុងជំនួបពិភាក្សាការងាររវាងលោក និងលោកស្រី ផេថងថាន ស៊ីណាវ៉ាត្រា ប្រធានគណបក្សភឿថៃ ដែលជាកូនស្រីរបស់លោក ថាក់ស៊ីន ស៊ីណាវ៉ាត្រា នាវិមានរដ្ឋសភា នៅព្រឹកថ្ងៃទី ១៨ ខែមីនា ឆ្នាំ ២០២៤។ នេះបើយោងតាមការប្រកាសពីរដ្ឋសភាកម្ពុជា។
លោក ជាម យៀប ក្នុងនាមជាសមាជិកអចិន្រៃ្តយ៍ នៃគណៈកម្មាធិការកណ្ដាលគណបក្សប្រជាជនកម្ពុជា និងជាតំណាងប្រធានរដ្ឋសភា បានប្រកាសស្វាគមន៍ដំណើរទស្សនកិច្ចរបស់ប្រធានគណបក្សភឿថៃ និងគណៈប្រតិភូដែលសង្កត់ធ្ងន់ថា នឹងជំរុញទំនាក់ទំនងរវាងគណបក្សកាន់អំណាចកម្ពុជានិងថៃ ក៏ដូចជារដ្ឋាភិបាលនៃប្រទេសទាំង ២ ឱ្យកាន់តែស៊ីជម្រៅបន្ថែមទៀត។
លោកកត់សម្គាល់ទៀតថា៖ «ថ្នាក់ដឹកនាំនៃប្រទេសទាំង ២ តែងតែផ្លាស់ប្តូរទស្សនកិច្ចនឹងគ្នាជាញឹកញាប់នាមួយរយៈចុងក្រោយនេះ តួយ៉ាងកម្រិតសភា និងជួរថ្នាក់ដឹកនាំរដ្ឋាភិបាល ទាំងក្របខ័ណ្ឌទ្វេភាគី និងពហុភាគី ជាពិសេសគម្រោងនៃការមកបំពេញទស្សនកិច្ចរបស់ប្រធានសភាថៃលោក Wanmuhamadnoor Matha មកកម្ពុជា នាថ្ងៃទី ២១-២៣ ខែមីនាខាងមុខនេះ ក៏ដូចជាយន្តការពង្រឹងប្រព័ន្ធរដ្ឋសភាប្រទេសទាំង ២ រួមមានយន្តការសភាវ័យក្មេង និងស្ត្រី អន្តរសភាអាស៊ាន (អាយប៉ា) សភាឌីជីថល ជាដើម»។
ទន្ទឹមនឹងនេះលោក ជាម យៀប ក៏គាំទ្រចំពោះការពង្រឹងការផ្លាស់ប្តូរទស្សនកិច្ចរវាងថ្នាក់ដឹកនាំរដ្ឋាភិបាលប្រទេសទាំង ២ ខណៈប្រទេសទាំង ២ បានពង្រីកកម្រិតទៅជាដៃគូយុទ្ធសាស្ត្រគ្រប់ជ្រុងជ្រោយ ដែលជាសក្ខីកម្មបង្ហាញពីការរីកចម្រើនទំនាក់ទំនងទ្វេភាគីក្នុងយុគសម័យថ្មី។
លោកប្រធានរដ្ឋសភាស្ដីទីបានវាយតម្លៃខ្ពស់ចំពោះកិច្ចសហប្រតិបត្តិការរវាងកម្ពុជា និងថៃទាំងក្នុងក្របខ័ណ្ឌទ្វេភាគី កិច្ចសហប្រតិបត្តិការក្នុងតំបន់ និងអន្តរជាតិ ពិសេសលើវិស័យពាណិជ្ជកម្ម វិស័យទេសចរណ៍ ដែលមានសម្ទុះគួរឱ្យកត់សម្គាល់នារយៈពេលប៉ុន្មានឆ្នាំចុងក្រោយនេះ។ លោកបានផ្តល់យោបល់ថា៖ «កម្ពុជានិងថៃ គួរបង្កើនលក្ខណៈងាយស្រួលដល់ច្រករបៀងទេសចរណ៍ ជាពិសេសជំរុញយន្តការព្រះរាជាណាចក្រ ២ គោលដៅតែមួយ សំដៅសម្ទុះកំណើនវិស័យទេសចរណ៍»។
ក្នុងទំនាក់ទំនងគណបក្សនយោបាយ លោក ជាម យៀប បានសាទរចំពោះកិច្ចសហប្រតិបត្តិការរវាងគណបក្សប្រជាជនកម្ពុជា និងភឿថៃ ដែលគ្រប់វេទិកាតែងគាំទ្រគ្នាទៅវិញទៅមក ជាពិសេសក្របខ័ណ្ឌ ICAPP ហើយលោកបានស្នើសុំការគាំទ្រដូច្នេះបន្ថែមទៀតនាពេលខាងមុខ ដែលកម្ពុជានឹងធ្វើជាម្ចាស់ផ្ទះកិច្ចប្រជុំពេញអង្គនៃសភាអន្តរជាតិដើម្បីភាពអត់ឱននិងសន្តិភាព (International Parliament for Tolerance and Peace - IPTP) លើកទី ១១។ គណបក្សប្រជាជនកម្ពុជា នឹងធ្វើជាម្ចាស់ផ្ទះមហាសន្និបាតនៃសន្និសីទអន្តរជាតិនៃបណ្ដាគណបក្សនយោបាយនៅអាស៊ី (ICA-PP) លើកទី ១២ នេះ។
យោងតាមរដ្ឋសភាកម្ពុជា លោកស្រី ផេថងថាន ស៊ីណាវ៉ាត្រា បង្ហាញការជឿជាក់ថា កម្ពុជា និងថៃ នឹងបន្តមានសន្តិភាពរួមគ្នាដើម្បីការរីកចម្រើនផ្នែកសេដ្ឋកិច្ចនៃប្រទេសទាំង ២ ដែលលោកស្រីសង្កត់ធ្ងន់ថា សន្តិភាពជាបាតគ្រឹះសំខាន់ដើម្បីជំរុញកំណើនសេដ្ឋកិច្ច។
លោកស្រីបានលើកឡើងថា៖ «គណបក្សភឿថៃ និងគណបក្សប្រជាជនកម្ពុជា មានទំនាក់ទំនងដ៏ល្អ ដែលមានតាំងពីយូរមកហើយ និងត្រូវធ្វើឱ្យទំនាក់ទំនងដ៏ល្អនេះមានជាបន្តយូរអង្វែងទៅមុខទៀត»។
ជាចុងក្រោយ លោកស្រី បានគាំទ្រគំនិតរបស់លោកជាម យៀប ទៅលើការបង្កើនភាពងាយស្រួលលើច្រករបៀងទេសចរណ៍រវាងប្រទេសទាំង ២ កម្ពុជា-ថៃ ជាពិសេសជំរុញយន្តការព្រះរាជាណាចក្រ ២ គោលដៅតែ ១។
នៅល្ងាចថ្ងៃទី ១៨ មីនានេះដែរ លោកស្រី ផេថងថាន ស៊ីណាវ៉ាត្រា ក៏បានចូលជួបសម្ដែងការគួរសម និងពិភាក្សាការងារជាមួយលោកនាយកដ្ឋមន្ត្រី ហ៊ុន ម៉ាណែតនៅវិមានសន្តិភាព និងជួបពិភាក្សាការងារជាមួយលោក ហ៊ុន សែន ប្រធានគណបក្សប្រជាជនកម្ពុជាផងដែរនៅវិមាន ៧ មករា រាជធានីភ្នំពេញ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លើកឡើងថា ទំនាក់ទំនងល្អរវាងកម្ពុជានិងថៃ មានសារៈសំខាន់ជាខ្លាំង ជាពិសេសចេញពីកម្រិតរដ្ឋាភិបាល និងជួរបក្សកាន់អំណាចនៃប្រទេសទាំង ២។
លោកបន្តថា ទំនាក់ទំនងនេះកំពុងវិវត្តមកជាវិជ្ជមានតាមរយៈដំណើរទស្សនកិច្ចថ្នាក់ដឹកនាំប្រទេសទាំង ២ ញឹកញាប់ នាមួយរយៈចុងក្រោយនេះ ព្រមទាំងទំនាក់ទំនងក្របខ័ណ្ឌជិតស្និទ្ធរវាងគណបក្សភឿថៃ និងគណបក្សប្រជាជនកម្ពុជាតាមរយៈកម្រិតទំនាក់ទំនងប្រមុខបក្ស។
លោកថា៖ «ភាគីទាំង ២ ត្រូវការពង្រឹងទំនាក់ទំនងក្នុងក្របខ័ណ្ឌយុទ្ធសាស្ត្រ នយោបាយ វិស័យសន្តិសុខ ដែលទំនាក់ទំនងល្អនេះផ្តល់ផលប្រយោជន៍រួមទៅលើការគាំទ្រគ្នា ក៏ដូចជាទប់ទល់កម្លាំងប្រឆាំងរៀងខ្លួនជាពិសេសទៅលើការរួមគ្នាពង្រឹងសន្តិសុខព្រំដែនឧក្រិដ្ឋកម្មឆ្លងដែនការជួញដូរមនុស្ស»។
លោកថា៖ «លើវិស័យសេដ្ឋកិច្ចពាណិជ្ជកម្មក៏សំខាន់ផងដែរ ដែលកម្ពុជាជាប្រទេសនាំចូលផលិតផលថៃជាច្រើន ឯថៃវិញក៏កំពុងប្រើប្រាស់ធនធានកម្លាំងពលករជាខ្មែរច្រើនសន្ធឹកសន្ធាប់លើទឹកដីខ្លួនដែរ»។
ជាលក្ខខណ្ឌយុទ្ធសាស្ត្រកម្ពុជានិងថៃកាន់តែត្រូវការគ្នាចំពោះមុខការប្រណាំងប្រជែងភូមិសាស្ត្រនយោបាយរបស់មហាអំណាច ដែលមិនអាចយកគ្នាជាសត្រូវឡើយ ដែលភាគីទាំង ២ ធ្លាប់មានបញ្ហាប្រឈមខាតបង់ទាំងសងខាងពីចន្លោះឆ្នាំ ២០០៨ ដល់ឆ្នាំ ២០១១ អំឡុងប្រឈមមុខកម្លាំងយោធាដាក់គ្នា។
លោក គិន ភា ក៏បានស្នើឱ្យភាគីទាំង ២ បង្កើនការជជែកសម្រុះសម្រួលគ្នាដោះស្រាយបញ្ហាប្រឈមដែលនៅសេសសល់តួយ៉ាងបញ្ហាព្រំដែនដែលមិនទាន់ដាច់ស្រេច និងបញ្ហាជម្លោះវប្បធម៌រវាងប្រជាជនទាំង ២ ជាដើមដើម្បីផលប្រយោជន៍ប្រទេសទាំង ២៕