.jpg)
លោក អ៊ុំ រាត្រី ដឹកនាំកម្លាំងពិនិត្យទឹកនោម រកសារធាតុញៀននៅខេត្តបន្ទាយមានជ័យ កាលពីថ្ងៃទី ៥ ខែមីនា។ រូបថត រដ្ឋបាលបាលខេត្ត
ភ្នំពេញៈ ក្រសួងមហាផ្ទៃ បានប្រកាសពីការបន្តដាក់ទណ្ឌកម្មមន្ត្រីនគរបាលណាដែលមិនគោរពតួនាទី ភារកិច្ច ក៏ដូចជាល្មើសវិន័យនៃកងកម្លាំងនគរបាលជាតិ ដោយត្រូវប្រឈមនឹងការដកចេញពីតំណែង និងបន្ថយឋានន្តរស័ក្ដិ ខណៈគិតពីដើមអាណត្តិទី៧ មក មានមន្ត្រីនគរបាលប្រមាណ ១៦០ នាក់ហើយ ត្រូវបានបណ្ដេញចេញពីក្របខ័ណ្ឌនគរបាល។ ការប្រកាសដាក់ទណ្ឌកម្មបែបនេះ ធ្វើឡើងតាមរយៈសេចក្ដីប្រកាសស្ដីពីបទវិន័យមន្ត្រីនគរបាលជាតិដែលបានចុះហត្ថលេខាដោយលោក ស សុខា រដ្ឋមន្ត្រីក្រសួងមហាផ្ទៃ កាលពីថ្ងៃទី ១៥ ខែមីនា ឆ្នាំ ២០២៤។
លោកបានលើកឡើងថា គោលដៅកំណត់ពីបទវិន័យនគរបាលជាតិកម្ពុជា ក្នុងគោលបំណងលើកកម្ពស់ សីលធម៌ តម្លៃ សេចក្ដីថ្លៃថ្នូរ ជំនឿទុកចិត្ត ឧត្តមភាព កិត្តិយសនិងប្រសិទ្ធភាពនៃការបំពេញការងាររបស់មន្ត្រីនគរបាលជាតិ ដើម្បីរក្សាការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមជូនប្រទេសជាតិនិងប្រជាពលរដ្ឋ។
លោក ស សុខា លើកឡើងថា ភារកិច្ចដែលមន្ត្រីនគរបាលជាតិត្រូវធ្វើដើម្បីបម្រើផលប្រយោជន៍ជូនប្រជាពលរដ្ឋរួមមាន៖ ផ្ដល់សេវាជូនប្រជាពលរដ្ឋ ទាក់ទងនឹងការងារសន្តិសុខ សណ្ដាប់ធ្នាប់សាធារណៈនិងសុវត្ថិភាពសង្គម ដោយប្រកាន់ភ្ជាប់នូវអាកប្បកិរិយា ឥរិយាបថល្អ ប្រកបដោយក្រមសីលធម៌ ភាពស្មោះត្រង់ យុត្តិធម៌ និងភាពមិនលម្អៀងក្នុងពេលបំពេញភារកិច្ច។ ជាពិសេសបញ្ចេញមតិយោបល់ ឬប្រតិកម្មតបនូវទង្វើ និងពាក្យសម្ដីរបស់ខ្លួនប្រកបដោយភាពប្រុងប្រយ័ត្នទៅកាន់សាធារណជន។
លោកបញ្ជាក់ថា៖ «មន្ត្រីនគរបាលជាតិត្រូវបំពេញភារកិច្ចក្នុងការផ្ដល់សេវា ដោយឈរគោលការណ៍ស្មើភាពគ្នាចំពោះមុខច្បាប់ គោរពសិទ្ធិមនុស្ស និងភាពមិនរើសអើង ដោយឥតប្រកាន់ពូជសាសន៍ ពណ៌សម្បុរ ភេទ ភាសា ជំនឿ សាសនា និន្នាការនយោបាយ ដើមកំណើត ជាតិ ឋានៈសង្គម ធនធានឬស្ថានភាពឯទៀតឡើយ»។
ទន្ទឹមនឹងភារកិច្ចបម្រើផលប្រយោជន៍ជូនប្រជាពលរដ្ឋនេះដែរ លោកថា៖ «មន្ត្រីនគរបាលជាតិក៏មិនត្រូវយកម៉ោងរដ្ឋបាលទៅប្រកបមុខរបរផ្ទាល់ខ្លួន ជាពិសេសសម្លុត គំរាមកំហែងបំពានសិទ្ធិប្រជាពលរដ្ឋ យកឥទ្ធិពល ឬអំណាចនៅក្នុងមុខងារ ឬយកមន្ត្រីនគរបាលជាតិនៅក្រោមបង្គាប់របស់ខ្លួន ទៅប្រើដើម្បីទាញយកផលប្រយោជន៍អ្វីមួយ»។
លោកបន្តថា ក្រៅពីនេះ មិនត្រូវឃុបឃិតជាមួយជនល្មើសក្នុងការប្រព្រឹត្តនូវរាល់អំពើខុសច្បាប់ និងប្រព្រឹត្តនូវបទល្មើសគ្រឿងញៀន លេងល្បែងស៊ីសង ក៏ដូចជាបទល្មើសគ្រប់ប្រភេទ ក្នុងអាជីពជាមន្ត្រីនគរបាលជាតិ។
លើសពីនេះទៅទៀត មន្ត្រីនគរបាលជាតិកម្ពុជា ត្រូវគោរព និងអនុវត្តរាល់បញ្ជាដោយស្មារតីទទួលខុសត្រូវ និងគ្មានការតវ៉ាដេញដោលរកហេតុផល។ បញ្ជាណាដែលមានភាពច្បាស់ក្រឡែត ផ្ទុយពីច្បាប់ជាតិ ឬច្បាប់អន្តរជាតិ ត្រូវហាមឃាត់ ហើយក្នុងករណីនេះ អ្នកបញ្ជា ឬអ្នកអនុវត្តបញ្ជា ត្រូវទទួលខុសត្រូវចំពោះមុខច្បាប់ជាធរមាន។
លោក ស សុខា បានលើកឡើងថា៖ «ចំពោះការដាក់ទណ្ឌកម្មខាងវិន័យមាន ២ កម្រិត គឺកម្រិតទី១ តាមរូបភាពអប់រំ ស្ដីបន្ទោស ធ្វើកិច្ចសន្យា ឬព្រមានជាលាយលក្ខណ៍អក្សរ ឬការលុបឈ្មោះចេញពីតារាងឋានន្តរស័ក្ដិ។ ចំណែកកម្រិតទី២ តាមរូបភាព ការដាក់ឱ្យទំនេរគ្មានប្រាក់បៀវត្សរ៍ដោយបញ្ញត្តិមិនឱ្យលើសពី ១ ឆ្នាំ ឬការដកហូតមុខតំណែង កាត់បន្ថយឋានន្តរស័ក្ដិ ឬក៏ការដាក់ឱ្យចូលនិវត្តន៍មុនកំណត់»។
ក្រៅពីនេះ ក្រសួងមហាផ្ទៃ ក៏មានការដាក់ទណ្ឌកម្មវិន័យទៅលើមន្ត្រីនគរបាលជាតិណាដែលពាក់ព័ន្ធនឹងបទល្មើសព្រហ្មទណ្ឌ នឹងបញ្ជូនសំណុំរឿងនិងវត្ថុតាងទៅតុលាការជាដើម។
លោក ទូច សុខៈ អ្នកនាំពាក្យរងក្រសួងមហាផ្ទៃ បានប្រាប់ឱ្យដឹងនៅថ្ងៃទី ១៧ ខែមីនាថា បើគិតចាប់ពីដើមអាណត្តិទី៧ រហូតមកដល់ពេលនេះ ក្រសួងមហាផ្ទៃបានរកឃើញមន្ត្រីនគរបាល និងមន្ត្រីពន្ធនាគារ ដែលមានការប្រើប្រាស់សារធាតុញៀន ហើយត្រូវបានក្រសួងបណ្ដេញចេញពីក្របខ័ណ្ឌមានចំនួនប្រហែល ១៦០ នាក់។
លោកបន្តថា ដោយឡែកមន្ត្រីនគរបាលទូទៅដែលរងពិន័យឬល្មើសវិន័យនៃកងកម្លាំងនគរបាលជាតិវិញ ហើយត្រូវប្រឈមនឹងការបណ្ដេញចេញមានប្រហែលជាង ៥០ នាក់ និងក្រៅពីនេះមានការដកហូតនូវមុខតំណែង និងបន្ថយឋានន្តរស័ក្តិមានចំនួនជាង ២០ នាក់។
ចំពោះការអនុវត្តវិធានការទាំងនេះ ក្រសួងមហាផ្ទៃអនុវត្តតែក្នុងក្រសួងខ្លួនឯងមួយទេ ដែលមានន័យថា រាល់ការអនុវត្តវិន័យទាំងនោះគឺធ្វើឡើងសម្រាប់តែមន្ត្រីដែលបាននិងកំពុងបំពេញការងារដែលស្ថិតក្រោមការគ្រប់គ្រងរបស់ក្រសួងមហាផ្ទៃ។ ប៉ុន្តែប្រសិនជាមានករណីខ្លះបានចូលជាបទល្មើសព្រហ្មទណ្ឌ ដែលជាសមត្ថកិច្ចរបស់តុលាការ គឺមានមួយចំនួនក៏បានបញ្ជូនទៅនគរបាលព្រហ្មទណ្ឌដើម្បីកសាងសំណុំរឿងឱ្យតុលាការធ្វើការជាមួយគ្នាផងដែរ។ នេះបើតាមលោក ទូច សុខៈ។
លោកបន្ថែមថា៖ «ដូច្នេះហើយគឺត្រូវសម្អាតមន្ត្រី ឬកងកម្លាំងនគរបាល និងមន្ត្រីពន្ធនាគារឱ្យបានស្អាតជាដើមកុំមានការជាប់ពាក់ព័ន្ធនឹងគ្រឿងញៀនកុំឱ្យមានការល្មើសវិន័យ និងពង្រឹងឱ្យមានការគោរពវិន័យ ជាពិសេសគោរពតួនាទី ភារកិច្ចឱ្យស្របតាមច្បាប់កំណត់ជាដើម ដើម្បីជាគំរូក្នុងការណែនាំ និងអប់រំដល់យុវជន និងមហាជន»។
អ្នកនាំពាក្យដដែលបញ្ជាក់ថា នៅពេលមន្ត្រីមានការបំពេញតួនាទី និងភារកិច្ចក៏ដូចជាគោរពវិន័យទៅតាមច្បាប់ដែលកំណត់ គឺវារួមចំណែកជួយឱ្យការអនុវត្តច្បាប់កាន់តែមានប្រសិទ្ធភាព និងមិនមានអំពើពុករលួយផងដែរ៕
