.jpg)
ក្រសួងផ្ដល់ការងារជាង ២ ៥០០ កន្លែងដល់កម្មករនៅរោងចក្រ វ៉ាយ & ដាប់បែលយូ ហ្គាមេន កាលពីថ្ងៃទី ១៦ ខែមីនា។ ក្រសួងការងារ
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសផ្តល់ឱកាសការងារចំនួន ២ ៥៤៧ កន្លែង សម្រាប់កម្មករនិយោជិតនៅក្រុមហ៊ុន វ៉ាយ & ដាប់បែលយូ ហ្គាមេន (Y & W GARMENT CO., LTD.) ខណៈពួកគេកំពុងរង់ចាំដោះស្រាយ ក្រោយពីរោងចក្រនេះ បានប្រកាសបិទទ្វារ និងមិនបានបើកប្រាក់ខែជូនពួកគេ។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី ១៦ ខែមីនា ឆ្នាំ ២០២៤ បញ្ជាក់ថា៖ «ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានចុះផ្សព្វផ្សាយពីឱកាសការងារ និងមានមន្ត្រីរង់ចាំចុះឈ្មោះស្វែងរកការងារធ្វើភ្លាមៗជូនបងប្អូនកម្មករនិយោជិតនៅមុខក្រុមហ៊ុន វ៉ាយ & ដាប់បែលយូ ហ្គាមេនដើម្បីឱ្យបងប្អូនទទួលបានឱកាសការងារថ្មីជាមួយនឹងរោងចក្រសហគ្រាសនៅក្បែរតំបន់ដែលបងប្អូនរស់នៅ។ ឱកាសការងារចំនួន ២ ៥៤៧ កន្លែង ពីរោងចក្រ និងសហគ្រាស ជាច្រើនកំពុងរង់ចាំបងប្អូនកម្មករនិយោជិត»។
ជាមួយគ្នានេះក្រសួងការងារ និងបណ្តុះបណ្តាលវិជ្ជាជីវៈ ក៏បានអំពាវនាវថា ខណៈពេលបងប្អូនកំពុងរង់ចាំនីតិវិធី និងដំណោះស្រាយដើម្បីទទួលបានប្រាក់ឈ្នួល និងប្រាក់បំណាច់ផ្សេងៗពីក្រុមហ៊ុន វ៉ាយ & ដាប់បែលយូ ហ្គាមេន ក្រសួងសូមអំពាវនាវដល់បងប្អូន សូមមកទទួលសេវាជួយរកការងារធ្វើពី NEA ដើម្បីឱ្យបងប្អូនអាចទទួលបានការងារថ្មីឆាប់រហ័ស និងមានប្រាក់ខែបន្តភ្លាមៗ តាមរយៈសេវាការងាររបស់មជ្ឈមណ្ឌលការងារចល័ត នៃទីភ្នាក់ងារជាតិមុខរបរនិងការងារ (NEA) ដែលកំពុងចតនៅមុខក្រុមហ៊ុនវ៉ាយ & ដាប់បែលយូហ្គាមេន (Y & W GARMENT CO., LTD.) ស្រាប់ ឬទាក់ទងលេខទូរស័ព្ទ ០៧៧ ២៣២ ៣៧៨ / ០១៦ ៧៨៦ ៦៥៥ (Telegram)។
លោក ឆោម សុខឿន ប្រធានមជ្ឈមណ្ឌលការងាររាជធានីភ្នំពេញបានឱ្យដឹងថា រោងចក្រទាំងនោះមកពីប្រទេសសិង្ហបុរី ចិន និងកោះហុងកុងជាដើមដែលមានទីតាំងនៅជុំវិញរោងចក្រ Y & W ដែលផ្តល់ភាពងាយស្រួលដល់កម្មកររោងចក្រ Y & W។
ជុំវិញបញ្ហានេះ លោក អាត់ ធន់ ប្រធានសហភាពការងារកម្ពុជាបានឱ្យដឹងនៅថ្ងៃទី ១៧ ខែមីនា ថា ជាទូទៅ និងតាមផ្លូវច្បាប់ នៅពេលក្រុមហ៊ុនឬរោងចក្របិទទ្វារគឺត្រូវតែមានការទូទាត់ប្រាក់ជូនកម្មករ កម្មការិនី ខណៈកន្លងមកមិនមានការទូទាត់នោះ។
លោកបានបន្ថែមថា ដោយឡែកករណី រោងចក្រ Y & W នេះ ត្រូវបានសាលាដំបូងរាជធានីភ្នំពេញ និងក្រសួងការងារបានចេញសេចក្តីសម្រេចរឹបអូស ទ្រព្យសម្បត្តិ ប៉ុន្តែ លោកមិនទាន់ដឹងថា កម្មករកម្មការិនី ទទួលបានការទូទាត់ហើយឬនៅទេ ប៉ុន្តែបើមិនបានទូទាត់ជូនពួកគេវិញទេគឺជារឿងអកុសលសម្រាប់ពួកគាត់។
ជាមួយគ្នានេះ លោកក៏បានបញ្ជាក់ដែរថា ក្នុងអំឡុងពេលកម្មករកម្មការិនីមិនមានការងារធ្វើ ហើយក្រសួងរកការងារឱ្យធ្វើគឺជារឿងល្អបំផុត ប៉ុន្តែទីតាំងរោងចក្រ បើនៅឆ្ងាយគឺជារឿងលំបាកសម្រាប់ពួកគាត់ទៅវិញទេព្រោះត្រូវការស្វែងរកផ្ទះជួលថ្មីទៀត។
លោក អាត់ ធន់ បញ្ជាក់ថា៖ «សម្រាប់ខ្ញុំ យល់ឃើញថា បើដោះស្រាយអាចាស់ឱ្យចប់ ហើយផ្តល់ការងារនៅតាមរោងចក្រជិតៗ គឺជារឿងល្អ ព្រោះថាបើរោងចក្រនៅឆ្ងាយវាពិបាកដល់ពួកគាត់ តែជាជម្រើសរបស់គាត់ទេ»។
សូមរំឭកដែរថា សាលាដំបូងរាជធានីភ្នំពេញកាលពីថ្ងៃទី ១២ ខែមីនា បានចេញដីកាសម្រេចរឹបអូសបណ្តោះអាសន្ននូវទ្រព្យសម្បត្តិ និងសម្ភារជាកម្មសិទ្ធិរបស់ក្រុមហ៊ុនវ៉ាយ&ដាប់បែលយូ ហ្គាមេន បន្ទាប់ពីម្ចាស់រោងចក្របានរត់គេចខ្លួន និងមិនបានបើកប្រាក់បៀវត្សរ៍ជូនដល់ពួកគាត់។
ទន្ទឹមនឹងនេះដីកាក៏បានតម្រូវឱ្យសហកូនបំណុល ក្រុមហ៊ុននេះ និងឈ្មោះ YUEN PO FAI ជាម្ចាស់សហគ្រាស ត្រូវផ្ញើប្រាក់ចំនួនជាង ៣,២៩ លានដុល្លារអាមេរិកជាប្រាក់រំដោះ ដើម្បីទទួលបានការលុបចោលការរឹបអូសបណ្តោះអាសន្ន៕
